देगलूर नाका भागात एलसीबीचा छापा ५२,२०० रुपयांचा मुद्देमाल हस्तगत

नांदेड  २९ जुन ( प्रतिनिधी – माधव वाघमारे)
नांदेड जिल्ह्यात अवैध धंद्यांचे समूळ उच्चाटन करण्यासाठी पोलीस प्रशासनाने कंबर कसली आहे. पोलीस अधीक्षक डॉ. नीलाभ रोहन यांच्या आदेशानुसार जिल्हाभरात सुरू असलेल्या विशेष मोहिमेला आज मोठे यश आले आहे. स्थानिक गुन्हे शाखेच्या (LCB) पथकाने देगलूर नाका परिसरातील पशुवैद्यकीय दवाखान्याच्या मोकळ्या जागेत धाडसी छापा टाकून शेजारील तेलंगणा राज्यातील एका आंतरराज्यीय आरोपीला अटक केली आहे. त्याच्या ताब्यातून १ किलो ४० ग्रॅम वजनाचा अवैध गांजा जप्त करण्यात आला आहे.
गुप्त माहितीच्या आधारे टाकला छापा
पोलीस सूत्रांकडून मिळालेल्या माहितीनुसार, आज दिनांक २९ जून २०२६ रोजी स्थानिक गुन्हे शाखेच्या पथकाला एका गोपनीय बातमीदाराकडून खात्रीशीर माहिती मिळाली की, देगलूर नाका येथील पशुवैद्यकीय दवाखान्याच्या पाठीमागील मोकळ्या जागेत एक इसम ‘एन.डी.पी.एस.’ (NDPS) कायद्याचे उल्लंघन करून अंमली पदार्थ गांजाची बेकायदेशीरपणे विक्री करत आहे. माहिती मिळताच स्थानिक गुन्हे शाखेच्या पथकाने पंचांसह घटनास्थळी धाव घेऊन अचानक छापा टाकला.
आरोपी तेलंगणाचा; नांदेडच्या लिंकचा खुलासा
पोलिसांनी संशयित इसमाला ताब्यात घेऊन त्याची कसून चौकशी केली असता, त्याने आपले नाव मोहम्मद आमेर मोहम्मद इस्माईल (वय २३ वर्षे, व्यवसाय: मजुरी, रा. रकाश पेठ, बोधन, जि. निझामाबाद, राज्य: तेलंगणा) असल्याचे सांगितले. पोलिसांना त्याच्या जवळील काळ्या रंगाच्या बॅगची झडती घेतली असता, त्यात पांढऱ्या रंगाच्या नायलॉन पिशवीमध्ये हिरवट रंगाचा, दाणे व बिया असलेला सुकलेला अंमली पदार्थ ‘गांजा’ मिळून आला.
५२,००० रुपये किमतीचा १ किलो ४० ग्रॅम गांजा आणि २०० रुपयांची बॅग, असा एकूण ५२,२०० रुपयांचा मुद्देमाल पोलिसांनी घटनास्थळावरून जप्त केला. पोलिसांनी आरोपीकडे या गांजाच्या स्त्रोताबाबत अधिक चौकशी केली असता, हा गांजा त्याने नांदेडमधील पुजा जोंधळे (रा. शांती नगर, इतवारा, नांदेड) हिच्याकडून विक्रीसाठी आणल्याची कबुली दिली. सदर महिला आरोपी सध्या फरार असून पोलीस तिचा शोध घेत आहेत. अटक करण्यात आलेला आरोपी आणि जप्त केलेला मुद्देमाल पुढील कायदेशीर कारवाईसाठी इतवारा पोलीस ठाण्याच्या स्वाधीन करण्यात आला आहे.
या पथकाने केली यशस्वी कारवाई
सदर धडक कारवाई नांदेडचे पोलीस अधीक्षक मा. श्री. डॉ. नीलाभ रोहन, अपर पोलीस अधीक्षक (भोकर) मा. श्रीमती अर्चना पाटील, अपर पोलीस अधीक्षक (नांदेड) मा. श्री. सुरज गुरव आणि स्थानिक गुन्हे शाखेचे पोलीस निरीक्षक मा. श्री. अतुल भोसले यांच्या थेट मार्गदर्शनाखाली करण्यात आली. कारवाईत पोलीस उपनिरीक्षक महेश कोरे, पोलीस अंमलदार सुनील गंटलेवार, ज्ञानोबा कवठेकर, मिलिंद नरबाग, दिलीपकुमार चंचलवार, माधव माने, श्रीराम दासरे, मनोज राठोड, संघरत्न गायकवाड आणि चालक सुधाकर देवकते यांनी महत्त्वाची भूमिका बजावली.

पोलीस प्रशासनाचा कडक इशारा
नांदेड जिल्ह्यात अवैध शस्त्र बाळगणारे, वाळू उपसा व अवैध वाहतूक करणारे, बेकायदेशीर दारू विक्री, जुगार, गुटखा आणि अंमली पदार्थांची तस्करी व साठवणूक करणाऱ्या गुन्हेगारांची गय केली जाणार नाही. भविष्यातही अशाच प्रकारच्या अत्यंत कठोर कारवाया सुरू राहतील, असा सज्जड इशारा पोलीस प्रशासनाच्या वतीने देण्यात आला आहे