नांदेड १९ मे ( प्रतिनिधी माधव वाघमारे)
शहराचे विद्रुपीकरण करणाऱ्या अनधिकृत जाहिरात होर्डिंग्ज आणि बॅनर्सविरुद्ध नांदेड वाघाळा शहर महानगरपालिकेने मंगळवारी (दि. १९ मे) धडक मोहीम राबवली. या मोहिमेत शिवाजी नगर आणि कौठा परिक्षेत्रात अनधिकृतपणे बॅनर लावल्याप्रकरणी खाजगी बिल्डर, कंत्राटदार यांच्यासह बॅनर तयार करणाऱ्यांवर गुन्हे दाखल करण्यात आले आहेत.
मनपा हद्दीत जाहिरात फलक लावण्यासाठी महानगरपालिकेने एकूण ११८ ठिकाणे निश्चित केली असून, तिथे ठराविक आकाराच्या फ्रेमही बसवल्या आहेत. या निर्धारित जागेवर पालिकेचे शुल्क भरून नागरिकांना किंवा स्वयंसेवी संस्थांना तात्पुरती जाहिरात लावण्याची मुभा आहे. असे असतानाही, शहरात ठिकठिकाणी विनापरवानगी बॅनर लावून शहर विद्रुपीकरण केले जात असल्याचे मंगळवारी प्रशासनाच्या निदर्शनास आले.
भाग्यनगर पोलीस ठाण्यात ‘एफआयआर’ दाखल
शिवाजी नगर भागातील बजाज नगर येथे ‘धवन रेसीडन्सी’ या खाजगी बिल्डरचे बॅनर विनापरवानगी लावल्याचे आढळून आले. याप्रकरणी महाराष्ट्र विद्रुपन प्रतिबंधक कायदा १९९५ चे कलम ३ चे उल्लंघन केल्याबद्दल मनपाने कडक पाऊल उचलले आहे. याप्रकरणी अनिल दिलीप यादव, गणेश कटकम (कंत्राटदार) आणि विशाल माठी यांच्यासह बॅनर तयार करणाऱ्या व लावणाऱ्या अज्ञात व्यक्तींविरुद्ध भाग्यनगर पोलीस स्टेशन येथे गुन्हा (FIR No. ०२७०/२०२६) दाखल करण्यात आला आहे.
कौठा भागातही कारवाईची प्रक्रिया सुरू
शिवाजी नगर परिसरासोबतच कौठा भागातील मुख्य रस्त्यालगत देखील अनधिकृत बॅनर लावण्यात आल्याचे समोर आले आहे. याप्रकरणी सिडको ग्रामीण पोलीस स्टेशन येथे गुन्हा दाखल करण्याची प्रक्रिया मनपा प्रशासनाकडून सुरू करण्यात आली आहे.
महापालिकेचे आवाहन:
“शहरातील नागरिकांनी, व्यावसायिकांनी आणि बिल्डर्सनी महापालिकेने निश्चित केलेल्या अधिकृत स्थळांवरच रीतसर परवानगी व शुल्क भरून होर्डिंग्ज लावावेत. अनधिकृत जाहिरात फलक लावून शहराचे सौंदर्य खराब करू नये आणि महापालिकेला सहकार्य करावे.”
— महानगरपालिका प्रशासनयांच्या मार्गदर्शनाखाली झाली कारवाई
ही धडक कारवाई मनपा आयुक्त तथा प्रशासक डॉ. महेशकुमार डोईफोडे यांच्या आदेशाने, अतिरिक्त आयुक्त गिरीश कदम व उपआयुक्त स. अजितपालसिंघ संधु यांच्या मार्गदर्शनाखाली करण्यात आली. यामध्ये शिवाजी नगर विभागीय कार्यालयाचे क्षेत्रीय अधिकारी रमेश चवरे, इमारत निरीक्षक भरत शिवपुरे, अतिक्रमण पथक प्रमुख विशाल सोनकांबळे, दत्ता कल्याणकर व त्यांच्या पथकाने सक्रिय सहभाग घेतला. महापालिकेच्या या आक्रमक पवित्र्यामुळे अनधिकृत होर्डिंगबाजांचे धाबे दणाणले आहेत.
